قادین / ابوالفضل کریمی (آتابَی)

ساچلاریندان آسیلی ، اؤز ساچینی یوْلدو قادین
آچمامیش غنچه کیمین گول باغیندا سوْلدو قادین

اوتانیر غیرت اؤزو قارشینا چیخسین قادینین
چون کی غیرت یوْلوندا یئنیلمه‌ین قوْلدو قادین

دیکتاتورلار اؤلکه‌سین‌ده اوْلدو حقّین باغیران
کسدیلر بوْغازینی اؤز ایچینه دوْلدو قادین

یوْلو آزادلیغا دوْغرو , چون شرف ارکانیدیر
حق یوْلوندا دوروبان غیرت‌ایلن بوْلدو قادین

آزادلیق- عدالت‌له- میللی حکومت قورولور
سپر ائتمیش سینه‌سین گولّه‌لره اؤلدو قادین

توْولایا بیلمه‌دی بیر عمر حدیث‌ایله بیزی
بیر حدیث‌ایله بیر آن‌دا قهرمان اوْلدو قادین

ایچیرم آند« آتابه‌ی» من آنامین ساچلارینا
حق یوْلوندا اؤله‌جم ،بلکه اوْ گون گولدو قادین!

#Atabəy 📋 ۱۴۰۱/۷/۱۲

ارسال دیدگاه