منه آزربایجان یئتر / معص.م جبارپور

 

*
حیکایمده سطیر _سطیر
سنی جیزمیشام
سن
سن ای بوتون آن لاریمین گلینی
گل
گور ناسیل بیر سئوه جه یم سنی
تبریزدن
گونشلیینه قدر یولو
کپنک قانادلاریملا باشلادیم
کهکشانا قدر
بویله سینه بیر سئوگی
بیرده یارالی سئوگیلی
جیره ریم قوورولدو اوزاقلیغیندا
قوردوغوم دونیا _
یاراناجاق می ؟
آرازین اوتایی؟!
بوجاق به بوجاق
مثلا
پاییز گلینجه،
اللرینی توتاراق
خیاوانلار بویو
لیلی مجنونو بویلایاجاغام
مثلا
یاز اولونجا
گونش یاناغینی اوپسون قویمایاجاغام
گل منیمله
بوتونله شک
قوزئی یی _ گونئیی
گؤمک بیر یئره
آزربایجانلاشاق
گل بوتون آنی لاریمین اورتاقی اول
من بورادان اییی بیر شهر تانیرام سنین اوچون_
منیم اوچون؛
منیم قولاریمین آراسیندا
سنین قوللارینین آراسیندا
آرازی گئچمک گرکیر …
باخدیقجا
کؤلگه لر
گاه جانیما ایلیشیب قالار
گاه عصیانا دونر
گاهدا سسیزجه سینه سووشار گئدر جانییمدان
گله جه یم
اللریم دولو خاطیره لرله
گله جه یم
اوشاقلیق ساواشمالاریملا
گله جه یم
بیر دونیا اوره ک یارالاریملا
اویسا
اونلار دیزلریمده باغلانمالیدیرلار
قانجیقجاسینا اورییمده چیبانا دؤندو!
آزربایجان
یاری جاسینا
وارلیغین
گونلریمه سیغماز
اویسه
آدین
سسیمی تیتره دیر
هانسی جیهازلا اولچوله بیلر
بو سس تیتره ییشی؟
-سویله
آخ منیم آرزو شه ریم
هر شئی سندن آسیلی دیر
حتی
“سنی سئویرم” -دئمه یی
و سن دویامازسان!
اوففف
زینب پاشا نین
قیلینجینیدان آخان قان
آل دوداقلاریندان قوجلو
دوداقلارینین سئحیری
قاینادار؛
آرازین قوروموش بولاقلارینی
اوچماق ایسته یرم سئرچه لر دک
سینیر تانیمادان
قیزقالاسین اوپسیدیم
*
یئنه بیر دلی قیز جیغاز
بیر سیغارا
بیر بیتیک پاپراقلاری دولو قورو چیچکلر
قهرلری سانجیلینجا بوغازیما
گول قوخویورام
آزربایجانین اؤکسوزلوغو _
امانیمی کسنده
بیر آجیلیق ساپلانیر قیرتلاغیما
بیر اتاق توستوسونده ایتیرم…
منه بیر آزربایجان یئتر . ائله بو

معصوم جبارپور

ارسال دیدگاه