قشقائي ائل ادبياتي / علیرضا ذیحق

ايل لردي ايران ين فارس ناحيه سي نين، كازرون،لار،ممسني،سميرم،دوگنبدان،خلج و داراب منطقه لرينده گئچي قيليندان توخونموش اوبالاري گؤزه چارپير . اوبا ـ اوبا،اويماق ـاويماق داغلار دؤشونده ياشايير، قيشلاقدان يايلاقا، يايلاقدان قيشلاقا سار سيلماز بير اراده ايله كؤچورلر . قشقائي لرين توليدي ايش لري ايله علاقه دار دئمك كي، ايشلري حيواندارليق و بديعي خالچالار يارادماق . هاميسي دا ائلات . بير سيرا روايت لره گؤره، قشقائي تورك لري۲۴ ائل دن توپلانميش اوغوز ائللري نين نئچه ائلينه شامل اولورلاركي۱۳ ـ نجي يوز ايل ليگين ايكينجي  حصه سينده »هلاكوخان« ين غصبني نتيجه سينده اورتا آسيانين Yarkand آدلي يوردوندان ايرانا سورگون اولولار . قشقائي لغتي نين آدي ايسه ، Yarkand كناريندا يئرله شن بيركنددن آلينير . قشقائي لغتي نين ايضاحيندا آرتيرمالي ييق كي،» قاشقا« بير تور كجه لغت اولاراق حيوانلارين آلنينداكي آغ لكه يه دئييلر. داها آرتيق بوكي آغ آت صاحابي قشقائي آدلانار .

       شعر و شاعيرليك

ايل لر بويي شاهليق اصول اداره سينين حكم سوردوغو نتيجه سينده ، قشقائي لرين زنگين فرهنگي تاپدالانسادا، خلقين سينه دفتري اوچ يوز ايل ليك زنگين ادبي ارثي ، بيزيم عصره گتيريب چاتدير ميشدير . بو آرادا ، “مأذون” و ” يوسف علي بيگ” كيمي شاعر لرين ياراديجيليقينا اشاره ائتمك اولاركي ، خلق اونلارين  شعرلريني ، نسيل به نسيل سينه خزينه لرينده ، ياد أللردن قورويوب ساخلاييب لار .” مأذون” و “يوسف علي بيگ” ين شعر ديوانلاري بو گونه قدر تام حالدا توپلانيب چاپ اولماسادا ، قشقائي ائلي نين چوخوسي ، بو ايكي شاعرين شعرلرين  حفظ دن ازبر ديلر . ” مأذون” و ” يوسف علي بيگ” دن باشقا،” عيسي قاسم ” و”حسين صمصام ” آدلي شاعير لردن آد آپارماق اولاركي اونلارين ادبي ارثي ، سينه دن سنيه يه بيزيم عصره گليب چاتيبدير .

    ” مأذون ” و ياراديجيليقي

اوچ قرن بوندان اول ياشاييب يارادان قشقائي تورك لري نين گؤركملي شاعيري ” مأذون ” ، عؤمور بويو يوخسوللوقا چيرپيشان و بير ” عاشيق ” كيمي اوبا ـاوبا گزيب ائلي نين

شادليغيندا و ماتمينده اشتراك ائدن بير شاعيردير . داها دوغروسو او ، درده لره ائل ايله بيرليكده يانيب و دير” مأذون ” صميمي شعرلرينده ائلي نين اينجه دويغولاريني ترنم ائده ركن، ائلي نين ديلك لرينه و نيسگيل لرينه بديعي شعرلرينده جان وئريب . ” مأذون” ون اصل آدي ” محزون ” ايدي كي شعرلرينده ” مأذون ” تلخص ائديردي. مأذون عربجه، فارسجا و توركجه بيلن بير شاعرايميش . گؤركملي آذربايجان يازيچي سي ” ح . اولدوز ” ون ” مأذون ” حاققيندا بئله بير قيدي وار:

داگؤركملي توركمن شاعيري ” ملانفس ” ين شعرلري قشقائي شاعيري اولان » مأذون « ياراديجليقين يادا ساليري نئجه كي آيدين دير،  مأذون ون شعرلري تكجه قشقائيلر آراسيندا يوخ، بلكه باشقا تورك ديل لي خلق لر آراسيندا ايسه گئنيش اؤلچوده ياييليب و قيمت لنديريليب . مأذون  پوئز ياسيندان بير قوشماني بير ليكده اوخوياق:

بولبول ناله سي

گؤزل گـؤزلـري مـست  ايـميش خونريز

ارغـــوان  لـب لري ديــلي شـكرريـز

محنت چكميـش اوغــلان محبت لي قيز

پـاخــيل آتـا ظـاليـم آتـا وارايـمــيش

دئدي اوكـي قـويـدي عشـقين بنـاسي

معشـوق يـانـديراسـي عاشيق  ياناسي

قيز يل گول جفاسي بــولـبول نـالاسـي

شام  وارايـميش بو پروانــا وارايـميش

كيميـن دردي چوخدور كيــمين دردي آز

كيمـيـن دل پريشــان كيـميـن دل نواز

مجنون مست عـشق ديـر ليلي مست ناز

داغ وارايـميش بـو ديــوانا وارايمــيش

جـهـاني يــارادان جــــهان آفــرين

ازلـــدن بويورموش بو رســم بو آئيـن

فرهادا بيستــون خــسروا شـــيرين

بـو داستــان  بــو افســانا وارايـميش

من گلـمه ديـم بــوردا چــكم بــار غم

غـــم وارايمــش بـو غمخانا وارايميش

من ايچـمكده گؤ تـورمــه رم جـام جم

مـي وارايمــش بو مــيخانا وارايمــش

او عشوه كي رخــنه سـالــدي ايــمانا

او تيــر غـــمزه كي كــار ائتـدي جانا

نه بـير ” مأذون ” دؤشـو اولـدي نـشانـا

تـيـر وارايمسش بـو نــشانا وارايـمش

   “يوسف خسرو “و ياراديجيليـقي

” يوسف علي بيگ ” ايكي قرن بوندان قاباق ، قشقائي ائلي نين ” دره شوري ” طايفاسندا ياشاييب يارادان شاعرلردن ايدي و شعر لرينده ” خسرو ” تخلص ائدردي . دئديك لره گؤره يوسف علي بيگين ساوادي يوخ ايميش . حرمتلي آذربايجان اديبي ” يحيي شيدا ” حقلي اولاراق ” يوسف علي بيگ ” حاققيندا بئله يازير :” يوسف خسروين قوشمالاري هر صنفدن اعلاديـر . اونون قوشمـالارين اوخويـاركن ” عاشيق علسگر “ي هر ذهنده تداعي ائدير . چونكي بو قوشمالار جاذبه دار و ساده دير” گؤركملي قشقائي شاعيري اولان ” يوسف خسرو ” ليريك شعرين نهنگ بير صنعتكاريدير. نئجه دئيه رلر اونون ليريك شاعير اولدوغو هئج ده تصادفي دئيلميش . گنج جاغلاريندا ” سلطان” آدلي بير گؤزه له وورولماسي، ااونون عشقينه اوره ك باغلاماسي و مرادا چاتما ماغي ، بو ايشه اصل سبب دير . داها دوغروسو اونون ليريكاسي ، حياتي ايله علاقه دار مسئله دير . بونا گوره ده » يوسف خسرو «ين چوخلي شعرلري سئوگيلسي ساطانا خطاب دير . بو شاعردن روايت ائديرلركي عؤمرونون صون گونلرينده، بير عؤمور هجراندان صونرا ، سلطاناكي اوزامان قوجا و دوشگون بير قاري ايمش توش گلير و باشلايير بئنه سلطانا ئوز پاك عشقين ـ محبتين بيلديرمگه . آمما قاري » سلطان « ، » يوسف خسرو « سؤزلرين ائشيدجك ، اونو دانلاييب ملامت ائتمه گه سعي گؤسترير خاطير لاديركي مزارلا بير آدديم ليق آرالاري يوخدور .” يوسف خسرو ” دابير شعرده اونا بئله جواب وئرير:

سلطان عبث دئمه عؤمر گلدي كچـــدي

هنوز شهلا گـؤزون خمــاري چـوخـدور

سـن سـن بو دونــيادا ارم بــهشتــي

هنـوز عاشيق لرين توماري چـوخـدور…

” يوسف خسرو” ليريكاسي ساده و جانلي دير . او ليريكاسندا تكجه يوردون انساني گؤزه ل ليك لرين ستايش ائتمگه كفايت لنمير و طبيعينين سحرلي گؤزل ليك لرين اولدوقجا اينجه و دويغولو ترنم ائدير:

يقين بيلديم ياتان بختيم اويــانمـيش

بـوگـون غافــلدن يــارا اوغــراديم

بير نوچه باغچادا ، بيــر نـوچـه باغدا

آلمــايـا،هيــوايا، نـارا اوغــراديــم

ايـكي عقرب قرين گــؤردوم بـير آيا

گوني همــراه گــؤردوم  شـام يلدايا

سونبول قيزيل گوله سالميشدي سـايا

بيـر ســوســن لي لازارا اوغــراديم

” يوسف خسرو” ين اؤلمز ليريكاسي، قشقائي ائلي نين سرو بويلي گؤزل لرين تصوير ائده ركن ، اونلارين باطني گؤزل ليك لرين دنده غافل اولمايير . او اؤزونو حقيقي عشقين مفتوني و “حقيقت عاشيق “آدلانديرير:

حقيـقـت عاشيقم بالله دئيــيل لاف

زري زرگر تانير نــقره نـي صـرّاف

فلـك روا دئيل ئـوزون وئر انـصاف

شـكار ائديــب  ترلانيمي سارمينم

صون سؤزده دئمك كي ” يوسف خسرو ” قشقائي ائلي نين گؤزل عادت و عنعنه لريني ئوز ليريكاسيندا يئر به يئر خاطرلاتماسيني دا هئچ واخت اونوتماتيز:

بيـر دم ميـل ائت بيزيم باغ و ايوانا

صـفا وئره ك قـيزيل گولــه ريحانا

بيزه رسم دير حرمـت ائدك مهـمانا

قيز  سن قاييد گل منيــله بير دانش

” يوسف خسرو” ين قوشمالاريندان نمونه اولاراق بيري ذكر اولونور:

قوربانليق گئجه سي

قوربانليق گـئجه سي آيـريليب گئتمه

كيم لر اولار سحـر قـوربانـين سنـين

قوربان كي دئيـه رلر ايـلده بيــر اولار

ازلدن من ايـديم قــوربانيـن سنين…

گؤزل ! هجرانـينا چـوخ تاب ائيله ديم

هانسي گئجـه مــن خواب ائيله ديم؟

اجل جـان ايستـه دي جواب ائيله ديم

قويموشدوم كي ائده م قوربانين سنين

سن شخص شــاه مـنده  بنـدة فرمان

بير بـوسه لبيــندن درديـمه درمــان

نا تــوان جانــيما ائيله ديـم درمــان

تا بيرگون ائيله ييم قوربــانين سنيـن

بيرايمـيش، بيرايميش سن بيلن تاري

بو دنيـا فــاني ديــر يـــوخ اعتباري

” يوسـف خســرو” يـن وفـالي ياري

بير شيرين جانيـم وار قوربـانين سنين

ارسال دیدگاه