شئعر / قهرمان کامیل اوغلو

داشلارا سوواشان اولدوز ایشیغی
ساغیر بنؤوشه‌دن قارانلیق ایچیر
آچیر گؤزلريمده قان سارماشیغی
گئجه‌نین قاتاری اۆستومدن کئچیر

آلوولو خیمه‌ده گیزله‌نیب کۆلک
اوجاقلار اۆشویور آغیر شاختادا
یتیم ماهنیلارا اوچور کپه‌نک
دورنالار چکیلیب دارا آینادا

یاخامدان یاپیشیب ساری ماهنیلار
لئشلرین اۆستونه توفنگیم قوسور
بئینیمده اولاییر یالقیز جاناوار
اؤزونده آغلاییر، اؤزونده سوسور

دویغودان دوغولان پینتی پلمه‌لر
یاز گۆلوشو کیمی منده اسیردیر
قارا سلّولوندا دونان کلمه‌لر
اینان دوداغیمدا قبیر-قبیردیر

اۆره‌ییمده یئنه بیر خارابالیق
اوچوق دووارلاری داخمالار واردیر
بو پاییز اینیمه سالیب آرخالیق
قیش یولو الیمده هامار-هاماردیر

ماویلر بۆرونوب ماوی اؤرپه‌یین
گؤيلرده قارغالار گلین آپاریر
قانلی افق‌لارا دۆشن دیدرگین
تورپاقدا کسیلمیش اله یالواریر

✍️#کامیل_قهرمان‌اوغلو

ارسال دیدگاه